Чарговае спаборніцтва паміж маладым папаўненнем розных факультэтаў адбылося 30 і 31 кастрычніка. Ад жадання наведаць яго не было адбою, і таму арганізатары спланавалі правядзенне Шоу ў 2 дні. 30-га усе факультэты выступалі з поўнай конкурснай праграмай сваіх магчымасцяў, а 31-га адбыўся гала-канцэрт з нумароў, адабраных конкурсным журы. Я наведаў конкурс у першы дзень. Перад пачаткам спаткаліся з дэканам агранамічнага факультэта Фёдарам Фёдаравічам Седлярам, зайшлі ў буфет, каб папіць кавы. Фёдар Фёдаравіч перажываў за свой аграфак, бо яны працавалі на сельскагаспадарчых работах да апошняга і не мелі часу добра падрыхтавацца. Але, калі выступаў аграфак, са сваёй праграмай, заўважыць якія-небудзь агрэхі ў іх выступленні, было немагчыма. Іх сцэнарый якраз адпавядаў апошнім уражанням ад вясковай працы.